Жарнама беруші және блогер жарияланымның жарнамалық сипатын анық көрсетуі міндетті. Талап тарату тәсіліне қарамастан барлық коммерциялық материалдарға қатысты.
Жаңа ережелер «Жарнама туралы» және «Онлайн-платформалар мен онлайн-жарнама туралы» заңдарының нормаларын жүзеге асырады. Олар жасырын жарнаманы азайтуға және медициналық қызметтер нарығының ашықтығын арттыруға бағытталған.
Медициналық қызметтердің кез келген жарнамасында енді мемлекеттік лицензияның нөмірі мен күні, оны берген органның атауы, көрсеткіштер мен қарсы көрсеткіштер туралы мәліметтер, сондай-ақ жекелеген қызметтердің маманмен кеңескеннен кейін дәрігердің тағайындауы бойынша ғана көрсетілетіні туралы ескерту орналастырылуы тиіс. Ақпарат жақсы көрінетін және оқылатын болуы керек.
Денсаулық сақтау министрлігінің Медициналық және фармацевтикалық бақылау комитеті: басты мақсат — заңдылық пен ашықтықты қамтамасыз ету, айыппұл салу емес деп атап көрсетеді. Бұл ретте ережелерді бұзу Әкімшілік құқық бұзушылық туралы кодекстің 428-бабы бойынша әкімшілік жауапкершілікке әкеп соғады. Әрбір жағдай жеке қаралады.